Аймгийн Засаг дарга Д.Бауыржан өнөөдөр /2022.08.30/ АДРА Монгол олон улсын байгууллагын суурин төлөөлөгч Виндэл Маранан, тус байгууллагын удирдах зөвлөлийн гишүүд болон аймаг дахь төслийн менежер Б.Асемгүл нарыг хүлээн авч уулзлаа.
АДРА Монгол олон улсын байгууллагын удирдах зөвлөлийн гишүүд анх удаа манай аймагт айлчлан ирсэн бөгөөд, айлчлалын үеэр манай аймагт хэрэгжүүлсэн төсөл хөтөлбөрүүдийн үр дүн, нөхцөл байдалтай танилцаж, заавар зөвлөгөө өгч ажиллах юм. Энэ хүрээнд төслийн үр шим хүртэгчидтэй уулзаж тэдний амжилт, тулгарч буй асуудлуудыг тодруулж, цаашдын үйл ажиллагаа болон төлөвлөгөөн дээр ажиллаж байгаа аж.
Аймгийн Засаг даргатай уулзах үеэр АДРА Монгол олон улсын байгууллагын суурин төлөөлөгч Виндэл Маранан манай аймагт хэрэгжүүлж байсан төсөл, хөтөлбөрийн хэрэгжүүлэх хугацаа нь 2023 онд дуусч байгаа талаар танилцуулж үргэлжлүүлэх талаар ярилцаж байна гэдгийг онцлоо.
Уулзалтын үеэр талууд манай аймагт хэрэгжүүлсэн төсөл хөтөлбөрүүдийн үр дүнгийн талаар дэлгэрэнгүй ярилцлаа.
Уулзалтын төгсгөлд аймгийн Засаг дарга Д.Бауыржан АДРА Монгол ОУБ-ын Суурин төлөөлөгч Винделл Маранан болон удирдах зөвлөлийн гишүүдэд хүрэлцэн ирж уулзсанд талархаад “төсөл, хөтөлбөрүүдийн хүрээнд туслалцаа, дэмжлэг хэрэгтэй нийгмийн бүлгүүдэд хүрч ажиллаж, манай аймгийн иргэд, өрхүүдийн хүнсний аюулгүй байдлыг сайжруулж хоол тэжээлийн чанарыг нэмэгдүүлэх, газар тариаланг хөгжүүлэх үйл ажиллагааг амжилттай явуулж ирсэнд талархаж явдаг. Манай аймаг хүнсний ногооныхоо 40 хувийг дотоодоосоо хангах боломжтой болсон гэж холбогдох мэргэжилтнүүд хэлж байна. Танай байгууллагаас хэрэгжүүлсэн төслийн ачаар энэ жил төмсний хэрэгцээгээ 100 хувь, хүнсний ногооны 35 хувь, жимс жимсгэнийн 1,5 хувийг дотооддоо хангана. Аливаа төсөл эхэлсэн бол дуусах жамтай. Цаашид манай аймагт бусад салбарт төсөл хөтөлбөрүүдээ үргэлжлүүлэн хэрэгжүүлэхийг хүсэж байна, бидний хамтын ажиллагаа улам өргөжин гэдэгт итгэлтэй байна.” хэмээн тодотгов.
